會考經濟之答題技巧篇(第4講): Opportunity cost (機會成本)

雖然舊年大部份考生都講到opportunity cost嘅定義, 亦都識分 “value” of the option (選擇的「價值」)同 “cost” of the option (選擇的「機會成本」), 但可惜衰答題技巧而攞唔到full mark, 甚至攞0分! 好多考生只係俾d 「套套邏輯」的答案, 咩叫「套套邏輯」? F6 Econ堂會學喇! 即係 「講咗等於冇講, 一定係啱嘅嘢, 譬如話「聽日恆生指數一係升, 一係跌, 一係冇升跌」嘅廢話, 又例如响06-11(b)(ii)考生答點解薪俸稅同利得稅稅收會响經濟強勁復甦時增加, 齋講 「薪金增加, 所以薪俸稅稅收會增加」同埋「利潤增加, 所以利得稅稅收會增加」, 其實跟本冇解釋點解响經濟強勁復甦時薪金同埋利潤會增加, 從而令到薪俸稅同利得稅稅收會增加, 所以解釋果part冇分。

考生响解釋opportunity cost「會否」 “Explain whether” 受影響時, 首先要寫出立場---“Yes/No” (受影響/不受影響), 然後解釋。經濟友嘅學生聽講坊間有d保証會考合格嘅補習班教人「如果唔知Yes/No就唔寫, 以免扣分, 只要背到opportunity cost定義都攞到題目一半分數, 夠合格喇!」經濟友真係唔明點解呢d補習班竟然有market, 因為根據會考評分準則, 考生冇寫立場或者立場錯誤, 就算解釋正確都俾0分! 原因係考生只背出定義, 根本冇回答問題, 仲有, 任何答案出現前後茅盾, 成part就冇晒分! 所以, 大家要諗清楚立場, 諗吓題目嘅highest-valued option forgone會點先, 切忌做「人肉printer」, 一味將死記咗嘅opportunity cost定義 “print”落答題簿, 嘥墨!

解釋方面, part (a) 除咗講到 “it only affects the value of the option chosen (只影響選擇的價值), 仲要寫出條題目所指嘅option chosen係studying law (修讀法律), part (b) 除咗講到 “value of the highest-valued option forgone (被放棄的選擇中價值最高的那一項)下降, 仲要寫出條題目所指嘅機會成本係studying medicine (修讀醫學), 咁先攞到滿分o架!

經濟友